Die X-Klas word vandeesmaand in Suid-Afrika bekend gestel en die afwagting ten opsigte van dié bakkie se vermoë is baie groot. Suid-Afrika se bakkiemark is hoogs mededingend. Volkswagen se Amarok het reeds bewys dat ’n Duitse gehalte-ontwerp nie noodwendig genoeg is om verbruikers wat reeds getrou is aan hul Hilux of Ranger, te oorreed om iets anders te kies nie.
Vir die X-Klas is daar ’n dubbele struikelblok – prys én herkoms. Die snel groeiende bakkiemark het Mercedes se aandag getrek, maar die geriewe om ’n leerraam-onderstelbakkie te bou bestaan nie in sy voertuigaanlegte nie.
Die G-Klas, wat ook op ’n leerraam-onderstel gebou is, word deur Magna Steyr in Oostenryk vervaardig – en daar is nie oortollige vakmanne of toerusting om ’n nuwe reeks bakkies in die dieselfde fabriek te bou nie.
Vennootskap
Mercedes se oplossing was om ’n vennootskap te smee met ’n bestaande bakkievervaardiger en sodoende sy eie ontwikkeling van ’n dubbelkajuit te doen. Nissan se Navara, met sy kronkelvere, is as die vennoot gekies.
Juis hieroor is daar ’n brandpunt vir Suid-Afrikaanse bakkiekenners: Is die X-Klas bloot ’n vermomde Navara of ’n Mercedes-bakkie uit eie reg?
Volgens Mercedes is die onderstel aangepas om sterker te wees as die Navara s’n, aangesien die X-Klas in die topmodel ’n groter drieliter- V6-enjin moet dra. Navara het slegs 2.3 liter-enjins, wat ook gedeel word met die X-Klas se modelle wat nou in Suid-Afrika beskikbaar gestel word. Die X350d V6-dubbelkajuit volg eers later vanjaar.
Afgesien van die sterker leerraam, is die vering herontwerp en die binneruim is ’n kombinasie van onderdele wat bekend sal wees aan eienaars van driepuntster-passasiersmotors. Mercedes wou ’n dubbelkajuit na die mark bring wat ’n nuwe vlak van verfyning ten opsigte van wind-, enjin- en padgeraasonderdrukking sou stel.
Gevolglik is die X-Klas meer as 200 kg lywiger as sy Navara-eweknie. Die gewig kan toegeskryf word aan die teenwoordigheid van bykomende materiaal om klankdigtheid te bevorder.
Krag
Kragbronne is raseg Nissan. Albei 2.3 liter-dieselenjins word oorgeërf by Navara en lewer gevolglik 120 kW/403 N.m in die X220d, met die X250d wat toor met die turbo en 140 kW/450 N.m uit die enjin haal. Ratkaste bied ’n keuse tussen ’n sesspoed-handrat of ’n sewegang-outomaties, met laestrekratte en ’n agterste ewenaarslot vir die vierwieltrek X-Klas.
Weens die gewigsverskil is hy verrigtingsgewys nie heeltemal so fluks as sy Navara-bondgenoot nie. Dit is waarskynlik ’n regverdigbare prys vir diegene wat ’n bakkie soek met ongeëwenaarde kajuitstilte. Wanneer die X350d later homself vanjaar plaaslik aanmeld, sal die 3liter-V6 se 190 kW en 550 N.m sorg vir ’n hoëverrigtingsbakkie.
Oor die bakkies se werkvermoëns is daar geen twyfel nie. Die kronkelvere gee die X-Klas uitstekende ritgehalte, veral op sinkplaatpadoppervlaktes, en met die laai- en sleepsyfers is daar nie fout nie. Die bak is breed en diep teen 2,4 m2, genoeg om ’n palet met gemak te dra en die laaivlak wissel van 1 082-1 126 kg, na gelang van die model. Die X-klas is ook nie skaam vir sleepwerk nie; die tweewieltrekmodelle haak 3 200 kg, terwyl die vierwieltrek X250d sowat 3 500 kg kan baasraak.
Veiligheid
Die X-klas se troefkaart is veiligheid. Met dubbelkajuitbakkies wat hoofsaaklik as gesinsvoertuie gebruik word, is die voordeel van veiligheidstoerusting van die X-klas opvallend. Geen ander plaaslike bakkie kan by die Mercedes se sewe lugsakke en outomatiese noodremaksie byhou nie.
Knelpunte? Die sitplekke is gemaklik, maar van die afwerking is steeds meer Nissan as Mercedes. Die stuur het nie diepteverstelling nie en die ekstra gewig wat toegewy is aan klankdigtheid belemmer die bakkie se verrigting.
Vir Mercedes-aanhangers wat van plan was om te hard te werk met die X-klas as ’n plaasbakkie is die intreevlakmodel nie vir ons mark beskore nie. Dit is jammer, aangesien dit ’n voertuig met staalwiele, eenvoudiger afwerking en ’n goedkoper prys is, maar steeds die ritgehalte en bestuursgemak van duurder X-klas-modelle het.
Soos kenners verwag het, breek die X-Klas ’n nuwe prysplafon vir plaaslike bakkies. Die reeks begin teen R642 103 en klim tot net oor die R800 000, met die duurste model wat teen R818 340 te koop is.
Die X250d 4x4-outomaties is bykans R200 000 duurder as sy Japannese teenstanders. Selfs Volkswagen se Amarok V6, die kragtigste dieseldubbelkajuit wat in Suid-Afrika te kry is, is goedkoper as die 2.3liter- viersilinder-X250d.
X-Class X220d 4X2 Progressive (handrat) – R642 103
X-Class X250d 4X2 Progressive (outomaties) – R694 025
X-Class X250d 4X4 Progressive (handrat) – R696 785
X-Class X250d 4X4 Progressive (outomaties) – R723 810
X-Class X250d 4X4 Power (handrat) – R791 315
X-Class X250d 4X4 Power (outomaties) – R818 340
