GWM se P-Reeks-dubbelkajuit verkoop soos soetkoek plaaslik en Chinese bakkies se aansien het aansienlik gestyg die afgelope paar jaar.
Die hoofrede hoekom ’n Chinese bakkie op jou plaaswerf staan, is waarde. Hierdie bakkies bied meer toerusting vir minder geld in vergeleke met Japannese of Amerikaanse bakkies.
JAC is nie ’n hoofspeler op die plaaslike voertuigmark nie, maar daar is ’n nuwe waarde-aanbieding wat baie naby aan die meeste boere se verwagtinge is. Die JAC T6-bakkiereeks het nou ’n 2,8 liter-turbodieselenjin, wat dalk min krag opwek, maar lae onderhoudskoste belowe.
Voornemende kopers sal dink daar is ’n inligtingsfout met die T6 2.8 TDI Lux se enjinsyfers. Die kragbron lewer slegs 68 kW en 210 Nm. Dit is minder as die helfte van ’n Hilux 2,8 liter-turbodieselenjin se werkverrigting. Hoekom roem JAC oor hierdie nuwe enjin in sy plaaslike bakkiereeks as die syfers so beskeie is?
Suid-Afrikaanse dieselgehalte is ’n dobbelspel en hoe meer gevorderd jou turbodieselbakkie se inspuitingstelsel is, hoe groter is die skade weens water of stofdeeltjies in jou diesel. JAC glo daar is ’n mark vir dubbelkajuitbakkies met ’n rustiger enjin wat kraglewering ruil vir duursaamheid.
Dit is veral boere en landelike kopers wat in JAC se visier is met die T6 2.8 TDI Lux. Dieselgehalte daal ongelukkig in verhouding met afstand buite ’n groot stad. Vir boere wat nie wil sukkel met bykomende filtreerlyne vir hul dieselopberging of aankope nie, maak die nederige, maar geharde 2,8 liter-turbodieselenjin van JAC baie sin.
Dubbelkajuitbakkies kan effens knap wees met hul laaibakafmetings en dravermoë, maar JAC se T6 reeks het ruim laaiplek bo die agteras.
Hoe vaar hierdie kanniedood enjin Chinese bakkie as ’n veldryer? Die JAC T6 2.8 TDI Lux 4x4 se grondvryhoogte is bietjie skraps teen 198 mm, maar met ’n laestrekratkas behoort jy hellings van 25% te verower, mits jou aantreeroete nie bots met die bakkie se 29,6°-aanvalshoek nie.
Die van die T6 2.8 TDI Lux is heel billik, teen R349 900 vir die 4x2 met ’n vyfganghandratkas, en R399 900 vir ’n 4x4-weergawe met ’n outomatiese sesgangratkas.
Vreemd genoeg is daar ? reuse-dieselverbruik verskil tussen die 4x2- en 4x4-weergawes, met eergenoemde wat loop teen 7,9 liter/100 km en die 4x4 outomaties, daai sesde rat nieteenstaande, wat 10,5 liter/100 km gebruik.
As jy nooit haastig is om op die dorp of by jou vakansiebestemming te kom nie, en ’n dubbelkajuitplaasbakkie begeer wat sonder angs op plaaslike diesel kan hardloop, is JAC se T6 2,8 liter-reeks meer as stof tot nadenke.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
