Die afgelope jaar was ’n groot vraag hoekom jy ’n Amarok sou koop as dit meganies dieselfde is as ’n Ranger. Ford se bakkiebesigheid is baie groter as Volkswagen s’n en gevolglik is die Amerikaanse motorvervaardiger se dubbelkajuitpryse meer mededingend. Maar is dit steeds die geval, met die nuwe Ranger en Amarok?
Daar is wild geraai hoe Volkswagen die nuwe Amarok sou aanbied in die plaaslike mark. Die vorige Amarok het ’n baie sterk teenwoordigheid in die segment vir luukse dubbelkajuitbakkies geniet vanweë die sterk 3 liter-turbodieselenjin.
Van enkelkajuitbakkies en eenvoudige dubbelkajuitbakkies vir plaaswerk was daar nooit juis sprake nie. Maar nou is daar.
Volkswagen se tweedegeslag-Amarok bied ’n baie breër modelreeks, met intreevlakbakkies wat die afgelope paar jaar nie deel van die Duitsers se plaaslike aanbieding was nie.
Die Amarok-dubbelkajuitreeks begin teen R599 000 met ’n 2.0 TDI-weergawe, wat oënskynlik minder waarde bied as die vergelykende Ford Ranger 2.0 TDI-dubbelkajuit teen R486 000.
Die goedkoopste Amarok-dubbelkajuit het slegs ’n vyfganghandrat en ’n turbodieselenjin wat 110 kW lewer. Die nederigste Ford Ranger-dubbelkajuit het ’n turbodieselenjin wat 125 kW lewer, en ’n sesgangratkas.
Vir R544 400 kan jy ’n Ford Ranger XL-dubbelkajuit met outomatiese ratkas aanskaf, met meer toerusting, en steeds redelik baie kleingeld oorhê vergeleke met ’n intreevlak-Amarok. Op die intreevlak bied die Ranger-dubbelkajuit verseker beter waarde.
Maar wat van die Amarok V6? Volkswagen bied drie dubbelkajuitweergawes van die nuwe Amarok met 3 liter-V6-turbodieselkragbron wat 184 kW lewer. Ford het slegs een Ranger met V6-dieselenjin beskikbaar: die outomatiese Wildtrak 4x4 wat R953 500 kos. Die vergelykende outomatiese Amarok Style 3.0 TDI V6 kos R966 000.
Daai pryse is naby, maar hoe lyk die toerustingvlakke? Heelwat soortgelyk, behalwe dat Ford se Wildtrak 4x4 ingeboude bedrading en dakskakelaars het as jy ’n wenas, spreiligte en allerhande ander veldrybykomstighede wil monteer.
Die tweestryd tussen Ford en Volkswagen in die dubbelkajuitbakkiemark gaan taai wees, omdat die nuwe Ranger en Amarok meganiese tweelinge van mekaar is. Ranger bied baie goedkoper intreevlakbakkies onder R600 000. Maar met ’n groter handelaarsnetwerk en meer tradisionele bakontwerp kan Volkswagen steeds ’n vastrapplek in die dubbelkajuitmark kry.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
