Bestellings oorskry die aanbod en daar is hoë vlakke van tevredenheid tussen eienaars van die knap, maar klein 4x4. Rotsvaste gebruikte voertuigpryse is ’n bewys van die Jimny se gewildheid.
Maar Suzuki se klein kanniedood-veldwa het ook swak plekke. Vir Suid-Afrikaanse kopers, wat ver op teer moet reis op pad na daai veldrybestemming, kan die Jimny se kort as-afstand senuagtige bestuursterugvoer skep, veral in rukwinde. Daar is ook min ruimte binne die Jimny vir pakplek. Jy kan slegs saamneem wat jy werklik benodig omdat die laairuimte so knap is.
Suzuki’s se driedeur-Jimny is ’n uitstekende verkenningsvoertuig vir twee mense, maar nie vir vier nie. Gelukkig het Jimny se wêreldwye welslae Suzuki nie blind gemaak vir die voertuig se beperkings nie.
Ná maande se geterg en beweerde ontwikkelingsketse het Suzuki uiteindelik die vyfdeur-Jimny bekend gestel, in Indië. Hierdie nuwe Jimny is 300 mm langer as die driedeurweergawe en met groot vaardigheid het Suzuki se ontwerpspan die kostelike bakverhoudings behou, met die voordeel van twee bykomende passasiersdeure.
Benewens die langer voor-tot-agter-bufferafstand is die syfer wat werklik saak maak, ’n 406 mm groter as-afstand. Dit is waar die aanvullende beenruimte vandaan kom vir passasiers in die tweede ry sitplekke. Die groter as-afstand sal ook op grondpaaie en snelweë beter stabiliteit teen hoë snelhede verleen.
Baie meer ruimte vir kampgoed
Jy hoef ook nie jou gunsteling-kussing of -kampstoel by die huis te los met ’n vyfdeur Jimny nie, omdat daar ’n 138%-verbetering in pakplek is, met ’n 208 liter-bagasieruim. Die reuse-verbetering in pakplek is meestal te danke aan ’n 50 mm hoër daklyn.
Suzuki se beproefde 1,5 liter-petrolenjin is met 77 kW en 134 Nm wringkrag bietjie wakkerder as in die huidige driedeur-Jimny. Hoewel die vyfdeur-Jimny se enjin 2 kW en 4 Nm meer opwek, sal versnelling ietwat meer beskeie wees omdat die vyfdeur-Jimny 100 kg swaarder is as die driedeur.
Met ’n algehele lengte van net minder as 4 m sal die vyfdeur Jimny dit steeds verspotmaklik wees om te parkeer as jy Saterdagoggend die dorpsverkeer aandurf vir inkopies.
Maar hoe beïnvloed die groter as-afstand veldryvermoë?
Suzuki se groter Jimny het ’n aanvalshoek van 36 grade, ’n oorbrugginghoek van 24 grade en vertrekhoek van 50 grade. Die kleiner veldwa se aanvalshoek is een graad beter, met vier grade meer oorbrugginghoek en ’n graad minder vertrekhoek. Grondvrye hoogte is dieselfde vir albei weergawes teen 210 mm.
Aanhangers van klein veldryvoertuie kan die vyfdeur-Jimny later vanjaar plaaslik verwag.Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
