Die Bonsmara-stoetery Poggenpoel Molopo van mnr. Kobus Poggenpoel van die plaas Aliceville by Setlagole naby Vryburg, Noordwes, is wyd bekend. Sy produksieveiling trek jaarliks kopers van reg oor Suid-Afrika. Verlede jaar het die 78 bulle wat verkoop is, gemiddeld R144 000 behaal.
“Dit stem ons tot diep dankbaarheid teenoor al die lojale klante wat ons elke jaar ruim ondersteun,” sê Poggenpoel, wat saam met sy twee seuns, Phillip en Kobus jr., boer. “Die klante spoor ons aan om elke jaar die diere te verbeter.” Die prestasie van die Poggenpoels se stoetery spreek vanself. Met seleksie konsentreer hulle onder meer op reproduksie, produksie en speengewigverhouding.
“As jy jou huiswerk doen, is ’n 50%-speengewigverhouding of selfs meer baie haalbaar.” Hul Bonsmaras word op gemiddeld 205 dae oud gespeen en weeg gemiddeld 270-280 kg – bulle én verse. Hul koeikudde het ’n besettingsyfer van meer as 90%.
Die Poggenpoels se veiling vind vanjaar op 31 Mei om 11:00 by Noord-Kaap Lewende Hawe se veilingslokaal op Stella plaas. Hulle hoop om 80 sterk jong bulle aan te bied, waaronder kuddevaars. Een kuddevaar, BBM 16-96, seun van BBM 13-21, behoort ’n hoogtepunt te wees. Daar sal ook 200 vroulike diere in verskillende produksiestadiums wees.
“Ons is dankbaar dat ons getal bulkopers elke jaar groei. Elke nuwe koper is vir ons ’n nuwe vriend,” sê Poggenpoel. Hulle nooi almal om die veilingsdag saam met hulle deur te bring.
Die Poggenpoels is dankbaar vir die borgskappe deur Molatek, MSD, AgriMark, Kaap Agri en Noord-Kaap Lewendehawe Koöp Vryburg.
