Die kompetisie is met die samewerking van Landbouweekblad en Omnia Kunsmis gehou.
Die oesdag, die grootste saamtrek van boere, werktuigvervaardigers en ander betrokkenes in die landbou, is weer gehou nadat dit twee jaar weens die covid-19-pandemie nie kon plaasvind nie. Die kompetisie vir boereplanne was ’n baie gewilde besoekpunt vir man en muis.
Nicoline Goosen, dogter van mnr. Bertus Goosen van Botswana, wat vier van die vyf afdelings gewen het, was die naaswenner in die huis-en-tuin-afdeling met haar oorgooipyp. Die patent bestaan uit vier leë 20 liter-kanne waarvan die bodems uitgesny is. Die een pas in die ander en vorm so ’n breë pyp waardeur mielies of meel vanuit ’n sleepwa of vragmotor tot in ’n hamermeul se invoergeut gegooi word. Die raamwerk aan die bokant pas netjies oor die wa of vragmotor se kant.
Die oorgooipyp voorkom dat van die voer vermors word. Sy sê dit bespaar ook baie tyd as iemand alleen moet voer maal.
Nicoline is ’n tuisskolier en is bykans klaar met haar matriekjaar. Sy het nog nie besluit wat sy ná skool gaan doen nie.
In die afdeling vir gemodifiseerde masjinerie, implemente en landboutoerusting was twee leerders in matriek aan die Hoërskool Bultfontein, GJ Nel van Senekal en Jadin Johnson van Aliwal-Noord, tweede met hul kunsmisstrooier. Hulle het dit gebou om die skool se rugbyveld te bemes. ’n Trekker met ’n kunsmisstrooier is te swaar vir die veld omdat die veld altyd nat gehou word. Die liggewig-strooier word met ’n selfaangedrewe grassnyer getrek, kan 50 kg kunsmis hou en strooi die kunsmis in ’n strook van 3 m uit. Die uitmeetapparaat is gestel om 100 kg kunsmis per hektaar toe te dien.
Hulle het die werktuig onder die toesig van hul landboutegnologie-onderwyser, mnr. GB Marx, gebou.
Nicoline se pa het die volgende afdelings gewen: nuwe masjinerie, implemente en landboutoerusting met sy veeldoelige spuit; gemodifiseerde masjinerie, implemente en landboutoerusting met ’n hoefsmidwerkstafel; gereedskap (elektries en nie-elektries) met sy hout-en-paal-uittrekker, en huis-en-tuin met sy wegstaan-PVC-isoleerders vir kampheinings.
In die ope afdeling het mnr. JP Rossouw van Potchefstroom met sy bye-uithaler koning gekraai. Hy het ook ’n spesiale prys daarvoor ontvang.
Nog ’n spesiale prys is toegeken aan mnr. Quintin le Roux van Stilfontein vir sy koring- en sojaboonstropertafel wat ongeveer die helfte van ’n nuwe een se prys gekos het. Toe hy sewe jaar gelede daaraan begin werk het, het dit hom ongeveer R500 000 gekos.
Volledige artikels oor die wenners verskyn eersdaags in Landbouweekblad.
