Besprekings op Graan SA se eerste kongres by Bothaville sedert die inperking weens covid-19 het op 26 Maart grotendeels gekonsentreer op insetkoste en hoe dit in die toekoms aangepak gaan word om dit vir boere makliker te maak om winsgewend te kan boer.
Mnr. Derek Mathews, voorsitter van Graan SA, het lede van die organisasie bedank vir hul bydrae deur middel van ’n vrywillige heffing om die organisasie by te staan terwyl hy nie die Nampo-oesdag en Nampo Kaap die afgelope twee jaar kon aanbied nie.
“Ons organisasie is deur moeilike tye. Dis soos om twee misoeste ná mekaar te hê, maar ek is ongelooflik trots om te rapporteer dat Graan SA kerngesond is te danke aan ons lede en ons personeel se harde werk. Dit beteken nie dat ons gemaklik is nie, en dat alles reg is en ons nie ernstig moet wees oor hoe ons met ons sake omgaan nie, maar ons kan trots wees dat ons organisasie kerngesond is. Ons sê vir julle almal baie, baie dankie!”
Tydens sy voorsittersrede het Mathews aangedui dat die organisasie tans voluit werk om die 2022 Nampo-oesdag in Mei aan te bied. “Ons uitstalruimte is 100% vol bespreek, met ’n waglys van uitstallers, maar ons weet almal hoe vinnig dinge kan verander en ons is nog nie absoluut seker dat ons Nampo op volskaal sal kan aanbied nie.”
Graan SA het reeds ’n aansoek by die nasionale korona-bevelsraad ingedien om Nampo aan te bied en wag tans op terugvoering.
*Graan SA het Vrydag, 4 Maart bekend gemaak dat Nampo 2022 vir 5 dae beplan word en nie die gewone 4 dae nie. Lees hier meer.
