Die styging in die pryse van basiese voedsel wêreldwyd verhoog die risiko dat 2007/’08 se voedselkrisis herhaal kan word, waarsku die Verenigde Nasies (VN).
Luidens ’n berig op Fin24.com het mnr. Jacques Diouf, die direkteur van die VN se Voedsel- en Landbou-organisasie (VLO) in ’n onderhoud gesê die sprong in oliepryse en die vinnige onlangse daling in die internasionale voedselvoorraad kan weer ’n krisis veroorsaak.
Tydens ’n onderhoud in die Verenigde Arabiese Emirate het hy gesê: “Die hoë pryse veroorsaak kommer en ons voorrade het vinnig begin daal. Ons waarsku al jare lank dat verhoogde produksie en beleggings in die landbou nodig is.”
Die VN se jongste voedselprysindeks dui aan dat pryse tot die hoogste vlakke nóg sedert 1990 gestyg het.
Voorrade
In Junie verlede jaar was voorraadvlakke ’n gesonde 100 miljoen ton hoër as vlakke tydens die 2007/’08-krisis, maar vinnige groei in ontwikkelende lande asook die terugkeer na groei in ontwikkelde lande het tot skerp dalings gelei.
Verskeie Afrikalande het groot hoeveelhede graan gekoop om moontlike onluste weens hoë voedselpryse te probeer afweer. Suid-Korea wil ’n strategiese graanreserwe-voorraad opbou deur mielies en ander stapelvoedsel te koop. Sommige Asiatiese lande volg glo dieselfde roete.
Diouf sê die onlangse skerp styging in oliepryse dra by tot hoër voedselpryse. Dít kan daartoe lei dat ontwikkelende lande nie kan bekostig om die nodige voedsel betyds in te voer nie aangesien dit die koste van vervoer en van landbou-produksiemiddele verhoog.
Hersien biobrandstof-strategieë
Diouf sê hulle het ook ’n beroep op ontwikkelde lande gedoen om hul biobrandstof-strategieë te hersien aangesien dié bedryf reeds 120 miljoen ton se grane vir menslike verbruik verwyder het om dit in brandstof te omskep.
Bron: Fin24
15 Maart 2011
