Boetiek- en kommersiële kaasmakerye van oor Suid-Afrika heen stal jaarliks hul produkte op die fees uit wat deur Agri-Expo gereël word. Mnr. Johan Ehlers, hoof- uitvoerende beampte van Agri-Expo, sê hulle was vanjaar saam met die uitstallers verras oor die sterk koopkrag by die fees – en dít ten spyte van die ekonomiese probleme vir verbruikers. Hulle skryf dit toe aan die gehalte van die produkte wat op die fees te koop was.
Die fees het ook aan verskeie nuwelingboetiekkaasmakers, soos Vredesberg, ’n bemagtigingsprojek van Kareedouw, ’n platform gebied om hul produkte aan die publiek bekend te stel. Dié uitstallers kon danksy die steun van die Wes-Kaapse departement van landbou en Absa hul produkte ten toon stel. Agri-Expo en die departement het ook kleiner produsente van alternatiewe gewasse en landbouprodukte, asook kleiner entrepreneurs die kans gebied om aan die fees deel te neem deur middel van die “Cape Made: Taste the Alternatives”-projek.
Kookuitdaging en waterbesparing
Die eerste #YourWheyWithCheese-kookuitdaging vir amateursjefs, in vennootskap met Heart FM, is vanjaar aangebied. Me. Liesl Armstrong van Durbanville, ’n huisleningskonsultant by Betterbond, was die wenner. Sy het ’n Jenny Morris-kookkursus, ’n Leon the Milkman-kaasmaakwerksessie en Taurus-kombuistoerusting gewen. Armstong sê danksy die fees en kompetisie het ’n droom van haar waar geword, aangesien sy nog altyd “bitter graag ’n sjefkursus wou bywoon om die fynere kunsies te bemeester”.
In reaksie op ’n versoek deur Wesgro om die ekonomie te midde van die droogte in die Wes-Kaap te ondersteun het die fees vanjaar ook die #waterwys-uitstalarea daargestel.Maniere om water te bespaar is daar ten toon gestel, terwyl waterwysresepte vir kookdemonstrasies op die fees ontwikkel is.
Dié resepte is vervat in ’n gratis resepteboek as deel van die Cape Made-projek. Die boek kan by www.cheesefestival.co.za afgelaai word (doen ’n soektog op die webwerf na recipe book).
