’n Onafhanklike ondersoek deur die Wes-Kaapse departement van landbou wys 62% van al sy bemagtigingsprojekte is suksesvol, sê mnr. Alan Winde, Wes-Kaapse minister van landbou en ekonomiese ontwikkeling.
Winde het gereageer op die hersieningsverslag wat die risikokonsultasiefirma Zalo Capital in opdrag van die Departement van Landelike Ontwikkeling en Grondhervorming uitgevoer het.
Daarvolgens het meer as 60% van die begunstigdes van die plaasaandeleskemas van die Regering aangedui dat daar geen verbetering in hul lewensomstandighede was sedert met die aandeleskemas begin is nie. Die konsultasiefirma het ’n hersiening
van die 89 plaasaandeleskemas gedoen waarvan 61% in die Wes-Kaap en 24% in die Oos-Kaap is.
Winde het gesê dit is moeilik om op die Zalo Capital verslag te reageer aangesien hy en sy departement dit nog nie gesien het nie.
“My departement het verlede jaar ’n onafhanklike ondersoek laat doen na die 246
bemagtigingsprojekte in die Wes-Kaap waarby ons betrokke is. “Dit het getoon dat 62% van alle projekte suksesvol en volhoubaar is. Van die 246 projekte is 83 aandeelhoudingskemas. Volgens ons inligting is met 88 skemas begin, waarvan vyf misluk het.”
