Ter illustrasie. Foto: Johan Norval
Die aansienlike verhoging van brandstofpryse, wat van middernag af geld, is nie goeie nuus vir verbruikers en produsente nie, sê mnr. Dawie Maree, hoof van bemarking en inligting by FNB Landbou.
Die prys van petrol sal met 81c per liter styg, terwyl ’n liter diesel 59c duurder sal wees.
Hy sê hoewel Februarie ’n betreklik stil maand is vir graanboere – een van die landbou se grootste verbruikers van diesel – kan ’n toename in prysinflasie in die komende maande verwag word, hoofsaaklik weens die toename in produkte se vervoerkoste. Dit sal gevolglik druk plaas op verbruikers se besteebare inkomste.
Maree sê die groot oorsaak vir die verhoging van brandstofpryse is hoë internasionale oliepryse en tot ’n mindere mate die wisselvallige wisselkoers.
Hy waarsku dat verdere verhogings in die komende maande kan volg na gelang van die prysbewegings van Brent-ruolie.
