’n Aanval op ’n gesin wat in ’n private natuurreservaat in die Muldersdrift-omgewing, naby die Cradle of Human Kind, woon, is met klappers afgeweer. Mnr. Robin van Rensburg sê hy het omstreeks middernag Maandagnag (11 April), wakker geword omdat sy honde geblaf het. Hy het opgestaan om ondersoek in te stel omdat die honde soms blaf vir wild wat naby aan die erf se heining beweeg.
Hy vertel voordat hy die badkamer se venster kon oopmaak om te kyk wat aangaan, het ’n flitslig op die venster geskyn. Van Rensburg het sy gesin wakker gemaak en almal in die hoofslaapkamer laat bly terwyl hy die Polisie gebel het.
Op die vlug geslaan
Van Rensburg het toe uitgegaan en ’n klapper in die rigting van die aanvallers gegooi en geskree hy gaan hulle doodskiet. Die drie mans het toe op die vlug geslaan met die honde kort op hul hakke.
Die verdagtes het egter so 300m van die huis af gaan staan, waar hulle met mekaar op selfone gepraat het. Die mans het toe weer die erf probeer binnekom, waarna Van Rensburg weer ’n klapper in hul rigting gegooi en geskree het. Die mans het in die donker skadu’s rondom die erf verdwyn en op die vlug geslaan.
Die Polisie
Die Polisie het Van Rensburg gebel en gesê hulle het verdwaal, hulle was glo by sy buurman se erf. Die beamptes het gesê hulle kry nie die huis nie en sal Dinsdagoggend (12 April), sesuur weer kom. Van Rensburg sê hoewel die sekuriteitswagte vroeg vanoggend by die veiligheidshek van die reservaat gesê het die Polisie het deur die nag daar ingery, weet hy nie of hulle wel weer kom ondersoek instel het nie.
Van Rensburg sê hulle is baie dankbaar dat hulle gespaar is, aangesien verskeie ernstige voorvalle al in dié gebied voorgekom het. “Dankie aan my God, my militêre opleiding wat my geleer het dat die element van verrassing altyd vir jou tel, en ’n klapper of twee.”
12 April 2011
