Twee plaasaanvallers wat met die lyk van ’n vermoorde boer in die kattebak van sy motor rondgery het, is doodgeskiet nadat ’n groep boere van Noordwes hulle vasgetrek het.
Susan Cilliers skryf op Netwerk24 die aanvallers het Saterdag omstreeks 14:00 op die plaas van mnr. Johan van Rensburg, ’n oudpolisiekaptein, buite Leeudoringstad toegesak.
Van Rensburg, wat oor 60 was, het met beeste op die plaas Droëkraal geboer en ’n kernrol in die totstandkoming van die plaaswagstelsel in die omgewing gespeel.
Kol. Sabata Mokgwabone, polisiewoordvoerder in Noordwes, het gesê die rowers het eers twee plaaswerkers met toue vasgebind en in die huis toegesluit. Toe Van Rensburg kort daarna op sy plaas kom, het hulle hom geskiet, in sy sedan se kattebak gelaai en gery.
’n Werker het sowat 1?km na ’n buurplaas gehardloop om hulp te soek. Die nuus het soos ’n veldbrand oor radio’s en selfone versprei. Verskeie boere het die motor op ’n grondpad naby Makwassie vasgekeer.
Van Rensburg se lyk is in die kattebak van die voertuig gevind. Die drie insittendes is met ’n gesukkel uit die voertuig gekry, waarna hulle weggehardloop het. 'n Skietery het gevolg en twee is gewond en later op die toneel dood. Die derde man is op die toneel in hegtenis geneem.
Volgens Mokgwabone sal die hof nog besluit of die boere vervolg sal word oor die skietery. “Ons ondersoek wel ’n moordsaak, maar niemand is in hegtenis geneem nie.”
* Lees die volledige berig op Netwerk24.
