Aartappels het die afgelope tyd swak publisiteit ontvang weens nuwe dieet-giere wat koolhidrate met ’n hoë glisemiese indeks (GI) belet. ’n Wêreld-deurbraak in die aartappelbedryf kan egter dié giere wysig.
Australiese navorsers het toevallig die lae GI-kultivar Almera geteel. Dié aartappelkultivar laat die bloedglukose-vlakke stadiger en tot op laer vlakke styg in vergelyking met ander kultivars.
Volgens dr. Alan Barclay, hoofwetenskaplike van die Glisemiese Indeksstigting van Australië, is dié aartappel die eerste aartappel wat internasionaal as lae GI gesertifiseer is en dit het ’n GI wat 30% tot 50% laer is as ander hoofstroom-aartappelkultivars.
Volgens mnr. Lourens van der Merwe, hoofbestuurder van verpakking by Fresh In Time Club (Edms.) Bpk., is dié aartappel sowat ’n jaar lank reeds beskikbaar by die supermarkgroep Checkers en Checkers Hyper onder die handelsnaam Carisma. “Die produk is nog nuut, maar geniet reeds groot aftrek onder verbruikers en behoort teen volgende jaar ook in ander supermarkte beskikbaar te wees,” sê hy.
Tans verbou sowat 20 kommersiële boere in Suid-Afrika dié kultivar. In die suide van die land word sowat 1,2 t bemarkbare aartappels per week aan Freshmark, Checkers se varsproduk-afdeling, gelewer en in die noorde sowat 4,8 t. Die aartappels word in sakkies van 2 kg verpak.
Benewens die aartappel se lae GI-eienskappe is dit ook ’n kort groeier, sê Van der Merwe. “Die kultivar groei 20 tot 30 dae korter as ander kultivars en boere kan dus bespaar op krag, water en arbeid. Dit bied ook weerstand teen bruinskurf, ’n aartappelsiekte.
Dié aartappel is ’n aanwins vir enige verbruiker, of jy nou dieet of nie en is geskik vir kook, braai of selfs kapokaartappels. Die enigste wenk: Moet dit nie té lank kook nie.
