Na meer as ’n jaar van ongewone aartappelpryse, het die aanbreek van die somer ook normaliteit in die prestasie van die aartappelprys meegebring. Vir die grootste deel van die afgelope 12 maande was die gemiddelde aartappelprys op varsproduktemarkte bo R45 vir 10 kg gebly.
Mnr. JJ van de Velde, ’n aartappelboer die KwaZulu-Natal-middellande, voorspel dat die prys vir die res van 2016 en selfs tot Paasfees in 2017 sterk onder druk sal bly. “Dit maak my kwaad, want ons sien die prys kom skerp af op die markte, maar die supermarkte dra nie die laer prys aan die verbruiker oor nie.
“Die produksie landswyd lyk egter beter en die volumes op die markte gaan skerp toeneem soos die somer aangaan en ek voorsien heelwat kontantvloeiprobleme. Ons sal weer ware boere moet wees in die seisoen wat kom om geld te maak, want ek sien R25 en R30 ’n sakkie oor Januarie.”
Mnr. Johan Laubscher, ’n aartappelboer van die Sandveld, het in Julie vanjaar in die Landbouweekblad voorspel dat die gemiddelde prys teen einde November by R35 gaan draai. “Ja, en daar is dit nou so, maar voorspellings is gevaarlik. Indien daar skielik nou ’n draai in die weer kom, ’n haelstorm iewers of so, dan verander die prentjie weer totaal. As daar egter nie ’n stok kraak nie, behoort ’n oplewing in die prys in begin Desember te sien en weer oor Kerstyd, maar daarna sal die prys onder druk bly,” voorspel Laubscher.
Tans lewer aartappelboere uit Limpopo steeds nagenoeg 70% van die aartappels op nasionale markte, terwyl ongeveer 15% uit die Sandveld kom. Die prys vir die top 25% van aartappels wat op markte verkoop word, wissel steeds tussen R50 en R55 per 10 kg.
“Dit is ’n goeie teken en beteken dat die vraag na aartappels steeds gesond is. Onsekerheid onder supermarkte oor hoeveel voorraad daar regtig is, speel ook ’n rol in die goeie prys vir gehalte produkte,” verduidelik Laubscher.
