Die LNR het op 2 Junie ’n artikel 189A-kennisgewing uitgereik waarvolgens 1 000 afleggings sou geskied en Solidariteit het ingegryp om sy lede by die LNR by te staan. Mnr. Peirru Marx, sektorkoördineerder by Solidariteit, het ná samesprekings met die LNR-bestuur sy misnoeë uitgespreek omdat die bestuur geen aanduiding kon gee van die poste waarna verwys word in die kennisgewing nie.
“Aangesien dit deel is van die artikel 189A-proses, is dit skrikwekkend dat die bestuur nie die inligting kon verskaf soos vereis word deur die wet nie. Die verwagting is tog dat die bestuur ’n deeglike ontleding sou doen voordat tot ’n drastiese stap oorgegaan word wat soveel poste sal raak.” Die kwessie word verder bemoeilik deur onsekerheid oor die posisie van die LNR se direksie. Die termyn van die ou direksie het einde Maart verval en die termyn is tot 30 Junie verleng om die minister ’n geleentheid te bied om ’n nuwe direksie aan te stel. Dit het klaarblyklik nog nie gebeur nie en Landbouweekblad se navrae hieroor is nie beantwoord nie.
“Ons het ons bedenkinge oor die werkswyse as ’n uittredende direksie so ’n drastiese stap soos die aflegging van 1 000 werkers goedkeur en dit dan bloot aan ’n nuwe direksie oorlaat om die proses deur te voer,” sê Marx.
Solidariteit was reeds besig met die derde gefasiliteerde sessie met die LNR, maar daar kon geen vordering gemaak word om met konsultasies met geraakte lede te begin nie. Die LNR kon steeds nie sê watter werkers geraak word nie. “Dit het ons met geen ander keuse gelaat as om die kommissaris van die Kommissie vir Versoening, Bemiddeling en Arbitarasie (KVBA) te vra om tussenbeide te tree nie,” sê Marx. “Gevolglik was die LNR genoodsaak om die kennisgewing te onttrek.”
Solidariteit en ander vakbonde sal eersdaags met die samestelling van ’n taakspan begin om alternatiewe te ondersoek om moontlike afleggings in die toekoms te vermy.“
Solidariteit tref voorbereidings vir ’n strategiese taakspan wat alle partye sal insluit, om die bes moontlike oplossing te vind vir die finansiële druk waaronder die LNR in hierdie stadium gebuk gaan. Dit is vir ons van deurslaggewende belang om ons lede se werk en inkomste in hierdie moeilike tye te beskerm. Ons verwelkom die nuwe ontwikkelinge en sal elke moontlike opsie ondersoek om werksverliese te vermy,” sê Marx.
Die LNR se enigste reaksie op navrae was dat hy betrokke is by ’n formele nasionale bedingingsforum met georganiseerde arbeid en dat ’n formele openbare verklaring uitgereik sal word sodra daar uitsluitsel is oor die kwessies onder bespreking.
