Afriforum het ’n beroep op die internasionale gemeenskap gedoen om die krisisafmetings wat plaasmoorde in Suid-Afrika aanneem, te veroordeel.
Dié beroep is tydens die burgerregte-organisasie se spreekbeurt by die Menseregteraad van die Verenigde Nasies (VN) se konferensie oor minderheidsaangeleenthede in Genève, Switserland, gedoen.
Volgens mnr. Kallie Kriel, uitvoerende hoof van Afriforum, is Engelse eksemplare van Treurgrond, ’n boek oor plaasaanvalle in Suid-Afrika, ook aan belanghebbendes oorhandig.
Kritieke afmetings
Afriforum het benadruk dat plaasmoorde kritieke afmetings aanneem terwyl die ANC steeds die “Skiet die boer”-lied verdedig.
“Terwyl die ANC aanvoer die slagspreuk moenie letterlik opgeneem word nie, word boere, vroue en kinders letterlik op plase vermoor,” sê Kriel.
Belanghebbendes en internasionale verteenwoordigers het die standpunt dat geweld teen minderhede veroordeel moet word, gesteun.
Kriel reken die ANC moet verantwoording doen oor sy verdediging van haatspraak teenoor boere terwyl talle boere jaarliks vermoor word.
30 November 2011
