Meer as 50 verteenwoordigers van 14 skoue wat lede is van die Kaap die Goeie Hoop Landbougenootskap in die Wes- en Noord-Kaap het Agri-Expo se jaarlikse landbhouskouvergadering in die Paarl bygewoon.
“Die doel van die vergadering is om idees uit te ruil tussen skoue, nuwe denkpatrone te stimuleer, tendense in die landbou – nasionaal én internasionaal – te bespreek, en skoudatums te koördineer. Vanjaar was ons tema Transformasie in Landbouskoue, om spesifiek aan opkomende boere ’n geleentheid te gee om self hul storie te kom vertel,” sê mnr. Johan Ehlers, Agri-Expo se hoof uitvoerende beampte.
Dr. Dirk Troskie, direkteur van sakebeplanning en -strategie by die Wes-Kaapse departement landbou, het vertel hoe hul Connect Agri-veldtog in samewerking met landbouskoue na die platteland wil uitreik. Die doel van dié program is om opkomende en kommersiële boere bymekaar te bring, nuwe dienste bekend te stel en om jong mense na loopbane in die landbou te lok.
Clanwilliam se landbouskou vir opkomende boere is deur me. Riana van Rensburg, landbou-adviseur van die Wes-Kaapse departement landbou uitgelig sa ’n goeie voorbeeld vir die bedryf. In 2015 het die skou 87 deelnemers gehad, met 69 skape en bokke, wat tot 191 deelnemers met 105 bokke en skape in 2017 gegroei het.
Die waarde van landbouskoue lê juis daarin dat “opkomende boere tog nie vir altyd opkomend kan bly nie; vir hul menswaardigheid, hul finansiële welvaart en vir die groei van die landbousektor, het ons nodig om hulle te help op die pad na volwaardige kommersiële boerderye”, sê Van Rensburg.
Kaap die Goeie Hoop Landbougenootskap (vandag bekend as Agri-Expo) is in 1831 gestig en is die oudste landbougenootskap in Suid-Afrika. Besoek www.agriexpo.co.za, skakel 021 975 4440 of stuur ’n e-pos na admin@agriexpo.co.za vir meer inligting. Volg Agri-Expo op Facebook of Twitter.
