’n Steekproef van Agri SA oor die haglike toestand van landelike paaie toon dat kommersiële boere die afgelope boekjaar koste van minstens R6 miljard aangegaan het vir herstelwerk en ander uitgawes wat verband hou met die haglike toestand van openbare paaie in landelike gebiede.
Mnr. Kulani Siweya, hoof- ekonoom van Agri SA, sê gemiddeld is sowat 94% van die deelnemers se produkte padlangs vervoer. Die gemiddelde waarde van hierdie produkte was sowat R23 miljoen per deelnemer en 69% van die deelnemers was verplig om self herstelwerk aan paaie te doen om dit begaanbaar te hou.
“Die landbousektor dra reeds sowat R128 miljard tot die bruto binnelandse produk by en daar is die potensiaal om dit te verhoog. Dit is egter nie moontlik as daar nie dringende aandag aan die verbetering van die vervoerinfrastruktuur gegee word nie.”
