Nóg ’n “provinsiale landbou-unie” vir Agri SA gaan binnekort in Mosambiek gestig word nadat ’n komitee die afgelope week op die been gebring is om die amptelike struktuur vir ’n verteenwoordigende organisasie vir Suid-Afrikaanse boere in Mosambiek te vestig.
Dié komitee, bestaande uit Suid-Afrikaanse boere met belange in Mosambiek, vergader weer op 14 Januarie om beslag te gee aan AgriSAMos, ’n landbou-organisasie wat Suid-Afrikaanse boere se belange in die land sal verteenwoordig. Die organisasie sal by Agri SA geaffilieer wees.
Dit was een van die uitvloeisels van ’n landbou-konferensie in die Gaza-provinsie verlede week wat deur bykans ’n honderd Suid-Afrikaanse boere bygewoon is. Dié provinsie wil meer as ’n miljoen hektaar landbougrond aan Suid-Afrikaanse boere beskikbaar stel.
Mosambiek bied ‘beste landboupakket’
Dr. Theo de Jager, ondervoorsitter van Agri SA, sê Mosambiek bied die beste landboupakket van al die lande wat Suid-Afrikaanse boere probeer lok. Dit is die landbouvriendelikste land, dit is die naaste aan Suid-Afrika en vestiging is die goedkoopste. Meer as 800 Suid-Afrikaanse boere het reeds belange in dié land.
’n Suid-Afrikaanse boer van Maputo, mnr. Kotie Petterson, is voorsitter van die komitee wat die nuwe landbou-unie moet stig. Die komitee van ses lede vergader weer op 14 Januarue in Maputo om ’n konsepgrondwet saam tet stel, om te besluit oor ’n finansieringstruktuur en om oor boervestiging te praat.
Mosambiek het ook sy eie landbou-unie, maar dié organisasie se strukture strek nie tot op streek- en grondvlak nie. Agri SA het onderneem om die land te help met die uitbreiding van sy eie organisasie en ook om bedryfsorganisasies vir verskillende produkte op die been te bring. AgriSaMos sal egter net omsien na Agri SA se eie lede se belange in Mosambiek.
29 November 2010
