Agri SA se huidige bestuur moet dit ten doel hê om dié landbou-organisasie relevant tot die veranderende landbou-omgewing te hou sodat dit vir die volgende generasie ook nog van waarde in die in 'n moderne landbou-era sal wees. Só sê dié organisasie se voorsitter, mnr. Johannes Möller, oor die planne om 'n maatskappy te word.
Möller het by die onlangse Mpumalanga Landbou-kongres gesê dit het tyd geword vir Agri SA om weg te beweeg van sy ou beleid. "Oor die jare het ons gesien Agri SA moet homself elke sewe tot agt jaar vernuwe en soos ons in 2001 'n 'oorleef en bly voortbestaan'-beleid gevolg het en toe in 2009 'n nuwe besluitnemingstelsel geïmplementeer het, so moet ons nou 'n meer vaartbelynde struktuur implementeer.
Leiers gekortwiek
Möller verduidelik dat die huidige bestuurstelsel die organisasie se leiers kortwiek wanneer vinnige beleidsbesluite nodig is. "Dit behels 'n lang heen-en-weer-stuur van beleidsbesluite tussen die funksionele komitee, die dagbestuur, bedryfskamers en die raad. Dit het partykeer tot twee jaar geduur om 'n besluit deurgevoer te kry," sê hy.
Die maatskappymodel wat die organisasie effektief in 'n nie-winsgewende maatskappy kan omskep, met 'n besigheidsvleuel, Agri SA Enterprises, wat aangewend sal word om geld te genereer, sal eersdaags voor die algemene raad dien.
Die algemene raad sal in die nuwe struktuur deur 'n direksie vervang word, waarin boere gaan dien. "Boere gaan in die meerderheid wees in hierdie direksie," verseker hy.
Te veel wat stuur en roei
"Hierdie skip is groter as die mense daarop en in hierdie stadium is daar té veel van ons wat gelyktydig stuur en roei. Ons het 'n meer vaartbelynde struktuur nodig waar iemand aan die stuur is en soos enige ander maatskappy se uitvoerende hoof, aanspreeklik gehou kan word."
Die direkteur-generaal vir Landbou, mnr. Mike Mlengana,wat ook 'n spreker by die kongres was, het Agri SA geloof vir die voorstel. Hy was veral diep geraak deur Möller se stelling dat Suid-Afrika eenheid oor die landbou moet bereik, selfs al is daar nie eenheid in landbou nie. "As ons aanhou om na die tafel toe te kom met wat ons elkeen vir onsself wil hê, gaan ons aanhou om oor kapitalisme en sosialisme te praat. Kom ons begin praat oor wat ons vir die landbou wil hê," sê Mlengana.
