Die gebruik van kinderarbeid is nie ’n praktyk wat in die gevestigde kommersiële landbou voorkom nie. Agri SA sê luidens ’n verklaring inspeksieverslae van die Departement van Arbeid bevestig dié stelling. Die organisasie se algemene raad het die kwessie die afgelope week tydens ’n vergadering bespreek.
Die organisasie sê indien gevalle gevind word waar kinderarbeid wel op plase gebruik word, die reg sy gang moet gaan om sodanige oortreders aanspreeklik te hou.
Steun
Die organisasie het ook sy steun toegesê aan me. Mildred Oliphant, die Minister van Arbeid, se oproep teen die gebruik van kinderarbeid. Agri SA vereenselwig hom ook met die Nasionale Dag teen Kinderarbeid wat Donderdag in Tzaneen in Limpopo gehou is.
“Dit is Agri SA se standpunt dat die gebruik van kinderarbeid onwettig sowel as moreel onaanvaarbaar is,” lui die verklaring.
"Die definisie van kinderarbeid is die volgende: Werk wat deur kinders onder die ouderdom van 18 jaar verrig word, wat tot misbruik kan lei en gevaarlik en onvanpas vir ’n kind is, hul skoolonderrig benadeel, en wat ook die sosiale, fisieke, verstandelike, geestelike en morele ontwikkeling van ’n kind strem.
