Agri SA is baie krities teenoor die Regering se halfhartige reaksie op die huidige grondbesettings, sê dr. Theo de Jager, ondervoorsitter van Agri SA.
Hy sê die landbougemeenskap was besettings te wagte. Agri SA het reeds sy lede gemaan om die nodige voorbereidings te tref.
“Ons het die tipe voorvalle verwag weens mnr. Julius Malema se uitsprake én na aanleiding van die optog wat verlede week plaasgevind het. Jy kan nie sulke uitsprake maak, wat ongestraf bly nie,” sê De Jager.
De Jager sê hulle het van politici en die Regering verwag om hulle sterk teen voorvalle van grondbesetting uit te spreek en dit duidelik te maak dat dit nie geduld sal word nie.
Voorvalle
In ’n tweede besettingsvoorval het honderde mense Maandag en Dinsdag (31 Oktober en 1 November 2011) glo op ’n kerk in Mthatha in die Oos-Kaap se grond toegesak om dit te beset. Luidens ’n berig op News24.com sê verteenwoordigers van die kerk die besetters het ’n komitee aangewys wat die 57 ha grond in stukke opgedeel het, wat hulle teen R7 000 stuk verkoop.
Die kerk het glo reeds om ’n uitsettingsbevel aansoek gedoen, wat Vrydag (28 Oktober 2011) op die besetters bedien is. Sommige mense het Dinsdag egter steeds geboue op die grond opgerig.
Die eerste voorval wat bekend geword het, is die besetting van mnr. Rusty Roodt se grond in die Hilton-omgewing. Dié besetters het glo aangevoer die grond behoort aan Malema.
KwaZulu-Natal se Hooggeregshof het intussen ’n interdik teen die respondent, mnr. Philani Bha Ndlovu, of enigiemand wat namens hom optree, ingestel totdat die saak op 21 November afgehandel kan word.
Bron: News24.com
2 November 2011
