Mnr. Melcus Nel, is 'n kenner van strategie en SEB-vereistes, asook direkteur van die Signa-groep. Hy sê die eerste algemene SEB-kodes is in 2007 gepubliseer, waarna sektore hul eie kodes kon ontwikkel het mits dit deur konsensus tussen belanghebbendes opgestel is.
Die landbou se eerste kode is in 2012 gepubliseer.
In 2013 is nuwe voorgestelde generiese SEB-kodes afgekondig (wat op 1 Mei 2015 in werking getree het), waarna sektore hul eie kodes daarby moes aanpas.
Die AgriSEB-handvesraad het sedert 2013 taai onderhandelinge daaroor gehad.
Organisasies, soos Agbiz, Agri SA en die TLU SA, is genooi om deel van die raad te wees.
Me. Lindie Stroebel, voormalige hoof van landboubesigheidsinligting by Agbiz, was baie betrokke daarby en Nel het ook namens Agbiz in die raad gedien.
Grondhervorming
Daar was groot druk dat grondhervorming ingesluit moes word. Danksy diegene wat daarteen baklei het, was dit gelukkig nie deel van die voorgestelde kode wat in April 2016 by die Departement van Handel en Nywerheid ingedien is nie.
Intussen het die departement me. Zodwa Ntuli aangestel as waarnemende kommissaris van die SEB-kommissie, wat toesig hou oor die inwerkingstelling van die Wet op Swart Ekonomiese Bemagtiging.
Sy het middel 2017 voorgestel dat 'n boer of landbou-onderneming wat deur 'n grondeis geraak word, wat amptelik erken en in die Staatskoerant afgekondig is, kwytgeskeld moet word van die meting van die eienaarskapelement van SEB.
Sy het ook voorgestel dat dit onnodig is om 'n spesiale fonds vir ondernemingsontwikkeling op die been te bring, aangesien dit reeds deur ander bedryfsorganisasies en maatskappye gedoen word.
Nel sê Agbiz het albei wysigings verwelkom.
Met dié wysigings is die kode deur die Kabinet goedgekeur, toe is dit deur die departement afgeteken, en daarna op 8 Desember in die Staatskoerant gepubliseer.
Nel sê Agbiz het wél deurentyd die standpunt gehandhaaf dat daar eintlik twee kodes moet wees: een vir boere en een vir landbousake-ondernemings.
Tydsraamwerk vir sertifikaat
Dit duur sowat 6 tot 8 weke van die begin van 'n verifikasieproses tot die uitreik van die sertifikaat.
Nel sê dit is egter van kardinale belang dat ondernemings die vereistes behoorlik evalueer en voor die einde van hul finansiële jaar in werking stel.
'n Sertifikaat is vir 12 maande geldig.
Eienaarskap en bestuur word op die datum van verifikasie gemeet en die ander drie elemente berus op die state van die jongste finansiële jaar.
NAVRAE: Mnr. Melcus Nel, sel 082 448 0356, e-pos: melcus@signa.co.za.
