Dit volg nadat die sektorale onderwys-en-opleidingsowerheid AgriSETA in Desember aangekondig het dat die kollege geakkrediteer is as opleidingsinstellings in die landbousektor.
Die vyf kursusse gaan studente in staat stel om ’n NQF4-plantproduksiesertifikaat te behaal. Die kursusse is toegespits op die verbouing van makadamias, sitrus, avokado’s, tafeldruiwe en mielies.
Daar word ook gewerk aan sillabusse vir 40 kort kursusse vir die kommersiële gewasse wat in Suid-Afrika verbou word. Hierdie kursusse sal stelselmatig van nou tot in 2020 ingefaseer word.
Dié wolkgebaseerde landboukollege het ontstaan uit die behoefte van ’n groep boere by Tzaneen in Limpopo om ’n landboukollege te bou vir die provinsie se plaaswerkers.
Die bouplanne is egter vroeg in die beplanningsfase verruil wolkgebaseerde of e-leerplanne wat dit moontlik maak om studente enige plek ter wêreld teen ’n fraksie van die koste op te lei. Die Universiteit Stellenbosch het intussen sy gewig agter die kollege gegooi en help om geakkrediteerde leerplanne daar te stel.
Mnr. Howard Blight, wat aan die hoof van Agricolleges International se stuurkomitee staan, sê hy is in die wolke oor die akkreditasie wat dit nou moontlik maak vir leerders wat in 2017 gematrikuleer het, om hul studie in 2018 voort te sit en so gou moontlik vaardighede te verwerf waarmee hulle tot die landbousektor kan toetree.
Daar is ’n groot behoefte aan landbougerigte opleiding en onderrig in Suid-Afrika. Teen November 2017 het meer as 900 studende reeds aansoek gedoen om toelating tot Agricolleges International.
Die instelling hoop om uiteindelik voorgraadse studente in verskillende landboudissiplines op te lewer.
