Landelike veiligheid en plaasaanvalle was vandeesweek onder debat in die Parlement en Agri SA verwelkom die aandag wat die kwessie ontvang, maar voeg by dat dat dit slegs van nut is as dit konstruktief tot plaasveiligheid bydra.
“Die gesprekke het weereens die fokus geplaas op die kwesbaarheid van die landbougemeenskap en die mate van geweld waaraan hulle blootgestel word. Agri SA verwerp egter met minagting sekere parlementariërs se uitsprake, soos in die media gerapporteer, dat boere lewendig begrawe moet word. Hierdie uitsprake dra geensins by tot nasiebou, maar lei tot polarisasie van gemeenskappe”, sê mnr. Kobus Breytenbach, voorsitter van Agri SA se landelike veiligheidskomitee.
Dit is nou belangrik dat die Parlement aandag skenk aan die skepping van ’n klimaat van verdraagsaamheid en “die skep van ’n begrip by die breër publiek dat almal wat by die primêre landbou betrokke is, as ’n bate vir die land beskou moet word. Deur die boerderygemeenskap te beskerm, sal stabiele voedselvoorsiening aan die bevolking verseker word, wat verder noodsaaklik is vir stabiliteit in die land”.
Voldoende hulpbronne by plattelandse polisietasies sal hulle ook in staat stel om die reservistestelsel en landelike beveiligingstrategie suksesvol uit te rol, sê Agri SA. “Hierdie strategieë is omvangryk en kan ’n daadwerklike bydrae maak om die boerderygemeenskap se bestaande beveiligingsmaatreëls te komplimenteer en landelike gebiede veiliger te maak. Dit is verder belangrik dat die polisie op stasievlak die goed ontwikkelde beleid en prosedure effektief implementeer, waardeur sigbare polisiëring verhoog en die landelike gebied gestabiliseer kan word.”
