Landwyd is daar tans 80 gevalle van die siekte in KwaZulu-Natal, 8 in Limpopo, 14 in Noordwes, 6 in Gauteng, 24 in die Vrystaat en 1 in Mpumalanga.
Luidens die verslag sal die 21-dae-verbod op die verskuiwing van beeste wat op 18 Augustus aangekondig is, slegs vir ’n “kort tydperk” van krag bly sodat die eksponensiële verspreiding van die siekte gestuit kan word.
Inentingsveldtogte word ook gevoer ten einde die verspreiding van die siekte te bekamp. Tot dusver is bykans 500 000 diere, meer as 260 000 daarvan in KwaZulu-Natal, teen die siekte ingeënt.
Intussen het Botswana, wat op 12 Augustus ’n verbod op die verskuiwing van spesifiek beeste en die invoer van beeste vanaf Suid-Afrika geplaas het, verlede week die verbod uitgebrei om alle diere met gesplete hoewe in te sluit. Dié stap kom te midde van ’n ondersoek van ’n vermoedelike uitbreking van bek-en-klouseer in Noordoos-Botswana wat aan Zimbabwe grens.
Mnr. James Faber, voorsitter van die nasionale Rooivleisprodusente-organisasie, sê dat hierdie bykomende uitbrekings tydens die verbod op die beweging van beeste voorgekom het, 'n aanduiding is van hoe versigtig daar opgetree moet word en hoeveel moeite gedoen moet word om die verdere verspreiding van die virus te bekamp.
