Die Amerikaanse departement van landbou het bekend gemaak dat boere teen 9 Junie nog net 83% van hul beplande hektaar geplant het, teenoor 99% in die ooreenstemmende tyd verlede jaar. Die departement het sy oesskatting na 348 miljoen ton verlaag, wat 9% laer is as die skatting in Mei.
In die stad Atlanta in die deelstaat Georgia is die meeste reën op een dag tot dusver aangeteken toe meer as 100 mm verlede Saterdag gemeet is.
Mnr. Luan van der Walt, ekonoom van Graan SA, sê die Amerikaanse skatting wat met sowat 34,3 miljoen ton vanaf die vorige skatting verlaag is, is ondersteunend tot pryse in die wêreldkonteks. “Die toename in internasionale pryse sal ook plaaslike pryse stut, omdat dit ook die pariteitspryse ondersteun. Suid-Amerikaanse pryse het in hierdie stadium ’n groter invloed op die plaaslike mark as die Amerikaanse prys, omdat Suid-Afrika eerste van Suid Amerika (Argentinië en Brasilië) af invoer.”
Van der Walt sê die invoer is veral ten opsigte van die Wes-Kaapse kusgebiede. “Invoerpariteit vanaf Suid-Amerika is in hierdie stadium die grootste aanspoorder van ons plaaslike pryse. Die swakker produksie in Amerika stut die Amerikaanse pryse, wat weer ander internasionale pryse ondersteun. Suid-Amerikaanse pryse het nie so skerp toegeneem soos die Amerikaanse prys nie, omdat goeie oeste hierdie seisoen gerealiseer het.”
Volgens die SA Graaninligtingsdiens se voorneme vir mielie-invoer beoog handelaars om van middel Mei tot die laaste week van Julie 88 121 ton geelmielies na Suid-Afrika in te voer. In dieselfde tyd word beoog om 110 615 ton witmielies en 47 327 ton geelmielies uit te voer.
Ontvang die nuutste landbounuus en -raad in verskeie bedrywe - teken HIER in vir een van ons nuusbriewe.
