Planne om die gebruik van antibiotika vir nie-mediese doeleindes in vleisproduksie uit te faseer, word in Amerika oorweeg.
Luidens ‘n berig op News24.com word dié planne voorgestel om die gebruik van vleis in dié land veiliger te maak. Beperkinge is reeds in die 1970’s voorgestel, maar dit is glo nie behoorlik toegepas nie.
Dokumentêre programme oor vleis en hoe dié land se goedkoop vleis geproduseer word, het die afgelope drie jaar glo tot groot bewusmaking onder verbruikers gelei. In dié tydperk het verkope van antibiotika-vrye vleis met sowat $175 miljoen of 25% toegeneem.
Intussen waarsku boere en organisasies dat beperkinge op die gebruik van antibiotika tot sieker diere, hoër insetkostes en gevolglik hoër voedselpryse gaan lei. Van die leiers in Amerika se landboubedryf voorspel dat boere tot $1 miljard oor tien jaar kan verloor.
Die Europese Unie het die gebruik van antibiotika in dié verband verban, en volgens die berig het dit tot dramatiese stygings in vleispryse gelei.
Bron: News24.com
24 April 2012
