Dit sal ’n kwade dag wees as die ANC net reageer op ’n plaasmoord wanneer dit gekoppel kan word aan iemand wat in die media bekend is, sê dr. Dirk Hermann, adjunk-uitvoerende hoof van Solidariteit.
Hy het gereageer ná die ANC die moord op sy oom, mnr. Frik Hermann (78), op sy plaas by Alma in Limpopo, skerp veroordeel het. In die verklaring sê die ANC dit is ’n ysingswekkende herinnering dat, te midde van buitengewone vordering met die uitwissing van misdaad, daar steeds mense is wat nie ophou met misdadige bedrywighede, soos plaasmoorde, nie.
Mnr. Jackson Mthembu, woordvoerder van die ANC, vra die Polisie om alles moontlik te doen om die misdadigers aan te keer.
“Die dood van mnr. Hermann het die land beroof van iemand wat die grootste deel van sy lewe gewy het aan boerdery – ’n bedryf wat van deurslaggewende belang vir ekonomiese groei en voedselsekerheid in die land is,” het hy gesê.
Dr. Hermann sê dit is ’n kommerwekkende teken dat plaasmoorde só algemeen geword het dat daar gewoonlik nie daarop gereageer word nie. “In Zimbabwe word plase gevat en die hele wêreld praat daaroor. Hier word mense op plase se lewens gevat en die internasionale wêreld swyg daaroor.”
Lees meer in Landbouweekblad se uitgawe van 18 Februarie 2011.
16 Februarie 2011
