Hy was onder meer verantwoordelik vir die stigting van ’n grondklassifikasiewerkgroep waarvoor hy deur die grondkundevereniging van Suid-Afrika vereer is.
Le Roux het in 1970 sy voorgraadse studie aan die UV voltooi en sy daaropvolgende akademiese kwalifikasies ook by sy alma mater verwerf.
Prof. Chris du Preez, een van sy oud-kollegas wat saam met hom op skool was by die landbouskool Landboudal op Jacobsdal, sê Le Roux se spesialisveld was grondklassifikasie en kartering, asook hidropedologie. Hy is sowat 12 jaar gelede as hoogleraar aangestel.
Le Roux het die bynaam Attie Karate gekry omdat hy hom in die Oosterse gevegskuns onderskei het. Hy het saam met sy broer, Ian, ’n Springbok-karateka, die sport afgerig. Hy was ook bekend onder die bynaam Piet Spook wat hy by Landboudal gekry het.
Me. Rida van Heerden, eertydse sekretaresse van die departement grondkunde aan die UV, beskryf Le Roux as ’n mensliewende kollega wat altyd bereid was om ander te help.
Ná sy aftrede in 2016 het hy en sy vrou, Queenie, hulle op Danabaai gevestig. Le Roux word oorleef deur sy vrou, hul seun, Stefan, en twee stiefkinders, asook Le Roux se twee kinders, Pieter en Louise, uit sy huwelik met sy eerste vrou, Sandra, wat jare gelede aan kanker oorlede is.
