Australiese melkboere is baie ontevrede nadat supermarkte besluit het om hul pryse aan boere tot AU$1 per liter te verlaag.
Luidens ’n berig op KondininGroup beskuldig die boere die land se regering daarvan dat hulle nie die boere se voortbestaan in ag neem nie.
Die Australiese regering het ’n verslag aangevra ná ’n besluit deur die Coles-, Woolworths- en Aldi-supermarkgroepe om hul eie handelsmerk-melk teen AU$1 te verkoop. Dié verslag het in die supermarkte se guns bevind.
“Die verslag sê die sny van die pryse was tot voordeel van verbruikers en het nie Australië se suiwelmark nadelig beïnvloed nie,” lui die berig.
Wet oortree
Die kwessies wat uit dié verslag voortgespruit het, stem ooreen met dié wat in 2010 in ’n verslag, Milking it for all it's worth, voorgekom het. Volgens die Australiese Mededingings- en Verbruikerskommissie (ACCC) kon geen bewyse gevind word dat die Wet op Handelspraktyke oortree is nie en sal die ACCC voortgaan om die sektor te monitor vir enige on-mededingende gedrag.
Mnr. Chris Griffin, voorsitter van die Australiese Melkboerorganisasie, sê die land se regering skuil agter die kommissie, en is “ondoeltreffend en magteloos”.
“Die regering het duidelike en onteensegbare bewyse ontvang dat Coles se bemarkingstaktiek ’n baie nadelige invloed op gesinne in die melkproduksiebedryf het en stappe moet nóú gedoen word.”
Bron: KondininGroup
8 Februarie 2012
