Mnr. Ayanda Kanana, voormalige uitvoerende hoof van die Land Bank en die Johannesburgse varsproduktemark, is met ingang 1 Junie vanjaar as nuwe uitvoerende hoof van Halls Fresh Produce (HFP) aangestel.
Kanana was van Maart 2020 tot April 2022 die uitvoerende hoof van die Land Bank. Nadat die bank lank sonder ’n heeltydse hoof was, moes Kanana dit deur ’n moeilike tyd lei omdat die bank nie meer sy verpligting kon nakom nie kort nadat Kanana daar begin werk het.
HFP sê in ’n verklaring hy neem die leisels oor by me. Tracey Davies, wat bevorder is tot besturende groepsdirekteur van die Halls-groep. Kanana is ’n geoktrooieerde rekenmeester en voormalige ouditeur. Hy is in 2019 as die uitvoerende hoof van die jaar in die openbare sektor aangewys.
Kanana sê dit is vir hom ’n eer om hom by Halls aan te sluit. Ná 10 jaar in die openbare sektor was hy op soek na ’n tuiste waar hy sy passie vir die bou ’n suksesvolle organisasie en sy liefde vir die landbou kon integreer.
“In Halls het ek ’n organisasie gevind wat waardegedrewe is, gebou is op etiese korporatiewe beginsels, en wat sy teenwoordigheid plaaslik en internasionaal uitbrei.” Hy sien uit na die geleentheid om met leiers internasionaal te werk.
Davies sê Kanana is nie net iemand met ’n nederige benadering, lewensvreugde en professionele vaardighede nie, maar het ook die sterk mensgerigte vermoë wat nodig is om die samewerking en sinergie te skep wat in die Halls-span nodig is op die vier vastelande waar die groep kantore het.
Die Halls-groep is ’n 130 jaar oue familie-onderneming wat, bykomend tot sy varsproduktesake, ook beduidende belange in eiendomsontwikkeling en die farmaseutiese, tegnologie- en finansiëledienstesektor het.
