Die slagoffer is Gawie Verreyne (93), die pa van Erik Verreynne, 'n bekende veearts in bewaringskringe, wat self in 'n hospitaal in Gauteng is vir 'n roetine operasie. Hy sê die voorval laat hom met “bekommernis, hartseer, woede, frustrasie en 'n gevoel van hopeloosheid.”
Sy neef, Gawie Gregory, ondersteun sy pa wat ook Gregory se oupa is, in die hospitaal. Gregory en sy pa, Anton Gregory, boer saam met Verreynne snr. op 'n plaas buite Kuruman.
Gregory vertel sy oupa is nog 'n baie aktiewe boer. “Op die dag van die voorval was hy dorp toe saam met 'n werker, Israel Kakutsi. Ek verneem hulle het buite die supermark naby die Oog parkeer, wat omstreeks 17:40 was. Israel het die trollie weggestoot nadat hulle die inkopies ingelaai het terwyl my pa in die voertuig ingeklim het. Sy deur was nog oop toe die aanvallers vir hom en Israel aangeval het. Israel vertel hulle het met my oupa gestoei, en toe val oupa uit die bakkie op die grond. Hy is op sy linkerwang gesteek en was erg bebloed. Dit lyk of my oupa se bankkaarte gesteel is, maar nie sy foon nie. Israel is met 'n mes gedreig, maar nie beseer nie. Die mans het weggehardloop en die familie is ontbied wat my oupa na die kliniek geneem het. Die personeel het vermoed sy wangbeen is gebreek en het hospitaalbehandeling aanbeveel. Ons het 'n ambulans ontbied om hom na Kimberley te bring, waar ons teen middernag aangekom het. Die operasie wat hy Donderdag moet ondergaan gaan lank wees, want daar is risiko’s aan verbonde.”
