Die nuwe gevalle kom voor op
plase wat voorheen negatief getoets het vir die siekte, asook op een bykomende
plaas wat deur die Vrystaatse departement van landbou, landelike onwikkeling en
grondhervorming ondersoek is omdat daar vermoed is dat die siekte daar kan
voorkom.
Luidens ’n verklaring wat die departement uitgereik het, is al die plase wat positief getoets het, onder kwarantyn geplaas om verdere verspreiding van die virus te verhoed.
“Daar word vermoed dat die twee plase wat voorheen negatief getoets het, op ’n heelwat latere tydstip besmet geraak het. Dit word verbind met hul nabyheid aan die ander plase waar positiewe gevalle aangemeld is,” lui die verklaring wat deur dr. Kristan Mojapelo, direkteur van veeartsenydienste, uitgereik is.
Hy sê die verspreiding van die besmetting tussen plase kan verband hou met diere wat onwettig verskuif is, die beweging van besmette voertuie of plaastoerusting en die seldsame moontlikheid dat die virus in boere se keel skuil.
Die departement het aan die nasionale departement voorgestel dat die huidige siektebeheergebiede in die Vrystaat heroorweeg word. Dit volg ná onder meer vertoë van organisasies soos Vrystaat Landbou dat distriksmunisipaliteite, wat soms honderde kilometers wyd strek, nie as afbakeningsmeganisme gebruik word om bek-en-klouseer op enkele plase in dorpsdistrikte te beheer nie. Boere en ander belanghebbendes in die rooivleis-waardeketting trek noustrop in hierdie distrikte omdat geen vee vervoer mag word, behalwe na ’n abattoir om geslag te word nie. Veral die verbod op veeveilings strem almal se kontantvloei.
Volgens Mojapelo is die voorstel dat die siektebeheergebied vir die Fezile Dabi-distrik in geheel opgehef word, terwyl dit in die Thabo Mofutsanayna- en Lejwelepuswa-distrik tot plaaslike munisipaliteite beperk word waar die virus steeds aktief is. Indien die voorstel deur me. Thoko Didiza, minister van landbou, grondhervorming en landelike ontwikkeling, aanvaar word, sal die siektebeheergebied tot die volgende plaaslike munisipaliteite beperk word: Maluti-A-Phofung (wat Bethlehem insluit), Setsoto (wat Ficksburg insluit) en Tokologo (wat Hertzogville insluit).
“Die voorstel word gekoppel aan wetenskaplike inligting wat toon dat die virus steeds aktief in hierdie munisipaliteite is,” lui die verklaring.
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
