Die beweerde uitbreking van bek-en-klouseer in KwaZulu-Natal blyk ernstig te wees en die Rooivleisprodusente-organisasie (RPO) steun tans die Regering se stappe om die uitvoer van alle diere met gesplete hoewe voorlopig op te skort.
Me. Tina Joemat-Pettersson, die Minister van Landbou, Bosbou en Visserye, het Maandag (28 Februarie), in die Parlement aangekondig dat verdagte, positiewe serologiese toetse in die buffersone van die provinsie opgemerk is. Sowat 600 diere is getoets, en 50% het positief getoets.
Ernstig
Mnr. Gerhard Schutte, die uitvoerende hoof van die RPO, sê die situasie blyk ernstig te wees, derhalwe steun die RPO die staat se stappe om uitvoer voorlopig op te skort. Die beweerde uitbreking is glo in die buffersone tussen die provinsie en Mosambiek.
Die departement het gesê daar is geen rede vir paniek onder boere nie, aangesien hul diere nie in onmiddellike gevaar verkeer nie. Schutte sê terugvoer van die departement oor die situasie word binne die volgende week verwag. Die geraakte gebiede moet onmiddellik afgesluit word.
Hy sê geen gevaar bestaan tans vir die verspreiding van die siekte na ander dele van die land nie.
Uitvoer
Volgens Schutte is die land ’n netto invoerder van rooivleisprodukte, maar hy sê dié tydelike opskorting van uitvoer kan ’n ernstige uitwerking op die bedryf hê. “Dit kan veral die bedryf in die binneland beïnvloed, asook op ander bedrywe wat met diere met gesplete hoewe werk.’’
Sodra die RPO verdere inligting van die departement ontvang het, sal hy die totale uitwerking van die situasie op die bedryf beter kan bereken.
28 Februarie 2011
