Me. Thoko Didiza, minister van landbou, grondhervorming en landelike ontwikkeling, het Dinsdagmiddag aangekondig ’n verbod op die beweging van beeste is uitgereik.
Dit geld die hele land en duur vir 21 dae, maar sal wel weekliks hersien word.
Die verbod beteken ook geen beeste mag tussen eiendomme geskuif word nie, ongeag redes.
Die enigste uitsonderings op die verbod geld in gevalle waar veeartspermitte uitgereik is vir beeste wat regstreeks na geregistreerde slagpale vervoer word, asook vir slag vir rituele doeleindes.
“Beeste wat klaar by skoue of veilings is, en beeste wat reeds na die republiek op pad is, kry 48 uur nadat hul verkoop is om na hul finale bestemming vervoer te word. Die plaaslike staatsveeartse moet vir permitte in dié verband gekontak word,” sê Didiza.
Enige verbreking van die verbod sal as ’n strafregtelike oortreding hanteer word.
Die uitbrekings in Suid-Afrika staan tans op 116 en sluit in gevalle op plase, in voerkrale en in kommunale gebiede in KwaZulu-Natal, Limpopo, Noordwes, Gauteng, Mpumalanga en die Vrystaat.
“Die besluit is geneem om die verspreiding van bek-en-klouseer in Suid-Afrika te keer,” sê Didiza in die verklaring.
“Die minister gee erkenning aan die pogings deur boere, gemeenskappe en bedrywe om die onwettige beweging van diere vanaf vermelde positiewe gebiede te voorkom. Sy erken ook pogings om biosekerheidsmaatreëls te verbeter. Ongelukkig het die siekte aanhou versprei met 15 nuwe eiendomme en twee nuwe provinsies wat net oor die laaste twee weke uitbrekings van die siekte aangemeld het.”
Sy waarsku oortreders wat beeste onwettig vervoer, dat hulle vervolg sal word ingevolge die Wet op Dieresiektes (Wet 35 van 1984).
“Die minister erken die groot ontwrigting wat die verbod op die normale bedrywighede van verskeie sektore gaan veroorsaak. Om dié rede is die verbod slegs op beeste van toepassing, aangesien die beweging van beeste as die hoofoorsaak van die voortgesette verspreiding van die uitbrekings geïdentifiseer is.
“Die publiek word egter daaraan herinner dat alle diere met gesplete hoewe bek-en-klouseer kan versprei. Die skuif van skape, bokke, varke en wild moet ook met die nodige omsigtigheid hanteer word.”
Diere wat moontlike kliniese simptome toon, soos blase in die mond, mank beweeg of letsels op kloue het, moet luidens die verklaring onder geen omstandighede geskuif word nie. Veeartse in die private sektor, distriks- of staatveeartsenydienste kan gekontak word in gevalle waar mense vermoed diere het simptome.
Die verbod moet nog in die Staatskoerant afgekondig word.
