Verskeie boere met wie Landbouweekblad op voorwaarde van anonimiteit gepraat het, kon bevestig dat die vol vrag speenkalwers deur die grenspos by Ramatlabana die land ingebring is. “Waarheen daardie kalwers gegaan het, weet niemand nie, maar dit voel soos ’n aanslag op die plaaslike veebedryf,” sê een van die boere. Die situasie laat kommer heers dat bewegingsbeheer nie voldoende toegepas sal word om die verspreiding van die siekte hok te slaan nie.
Daar is nog geen teken van padblokkades om die
beweging van vee deur Limpopo te beheer nie. ’n Uitbreking van bek-en-klouseer
in die provinsie is onlangs vir die tweede keer vanjaar bevestig.
’n Skrywe in Landbouweekblad se besit wys mnr. Mike Mhlengana, direkteur-generaal van die departement van landbou, grondhervorming en landelike ontwikkeling, het ’n versoek tot die weermag gerig om ondersteuning te verleen ten einde padblokkades op te rig langs sleutelroetes vanaf Limpopo na Noordwes, Gauteng en Mpumalanga om die verspreiding van bek-en-klouseer te voorkom.
Vyf boere in die omgewing van Vivo en Alldays met wie Landbouweekblad gepraat het, sê daar is nog geen padblokkades opgerig om die vervoer van vee te beheer nie. “Ons word verbied om ons vee na veilings te neem, maar daar is geen beheer om te verhinder dat vee verder geneem word nie,” sê een van die boere.
‘Net slagdiere mag vervoer word’
Die departement en die nasionale dieregesondheidsforum het vroeër vandeesweek gesê tot die huidige situasie gestabiliseer is mag lewende gespletehoefdiere nie verskuif word nie. Slegs gesonde diere wat dadelik geslag gaan word, mag vervoer word. Alle aankopers van vee moet seker maak die diere is vry van siektes, veral bek-en-klouseer.
Enige verhandeling van gespletehoefdiere moet van ’n veeartsenykundige sertifikaat vergesel word. Voertuie wat diere vervoer, moet deeglik ontsmet word – ver van ander diere – voor die volgende vrag diere gelaai word. Voertuie wat vee na abattoirs vervoer, moet ook ontsmet word voor dit die abattoirperseel verlaat.
Die departement waarsku dat diegene wat die verspreiding van bek-en-klouseer deur die beweging en vervoer van vee toelaat, siviel en strafregtelik vervolg kan word.
Enigeen wat dalk met die siekte in aanraking gekom het, moet ander klere en skoene aan te trek voor hy of sy met gesonde diere werk.
Vir bystand om die siekte te beperk, kan ’n plaaslike of staatsveearts gekontak word vir biosekerheidsriglyne of om ’n biosekerheidsplan vir die plaas op te stel.
Deur by die riglyne te hou en redelik en verantwoordelik op te tree, terwyl hulle op die hoogte van die situasie bly, kan die belanghebbendes help om die situasie te beredder.
Die departement en die nasionale dieregesondheidsforum het voorgestel dat alternatiewe opsies vir die verhandeling van vee oorweeg word. Dit sluit een-tot-een-transaksies van gespletehoefdiere (wild ingesluit), asook elektroniese veilings in, maar slegs indien alle biosekerheidsprotokolle, kwarantynstappe, veeartsenykundige sertifikate en naspeurbaarheidsregulasies gereed is voor die verhandeling plaasvind.
