Die skielike dood van mnr. Dave Stern (42) het skokgolwe deur die Oos-Kaapse landbougemeenskap gestuur nadat hy Vrydag (29 Julie) aan ’n aneurisme oorlede is.
“Tragies. Daar is regtig géén ander woord om dit te beskryf nie,” sê mnr. Peter Cloete, voorsitter van Agri Oos-Kaap, oor Stern se afsterwe.
Volgens Cloete het Stern gesukkel met hoofpyn toe hy die afgelope week opgeneem is by ’n hospitaal in Gqeberha. Hy is kort daarna na ’n hospitaal in Kaapstad oorgeplaas, waar hy later oorlede is.
Stern, veeboer op die plaas Quaggasvlei in die distrik Nieu-Bethesda, was ten tyde van sy dood die voorsitter van die Sneeuberg-boere-unie.
“Dave was heeltemal te jonk om te gaan. Hy het sy lewe aan georganiseerde boerdery gewei en het ’n fundamentele rol in die landbou en sy gemeenskap gespeel.”
Mnr. Roland Kroon, boer en hegte vriend van Stern, sê hulle is geskok oor die nuus van sy afsterwe.
“Dave was ’n ware gemeenskapsman. Hy het omgegee vir almal en hy was altyd die eerste ou wat jy kon bel as jy in die nood was. Ek onthou toe ek ‘n veldbrand gehad het, was hy die eerste bystand wat sonder kennisgewing opgedaag het en hy het 90km van my af gebly.”
Kroon sê Dave was een van die beste in sy veld en kom uit ’n familie van bewaringsboere wat vir jare al holistiese bestuur toepas.
“Sy familie was sy lewe en hy hulle s'n. Ons innige meegevoel met sy geliefdes.”
Dave word oorleef sy vrou, Maryke, dogters Kari en Micela, sy pa, Doug, voormalige voorsitter van Agri Oos-Kaap, sy ma, Liz, en susters Wendy en Diane.”
