Ainsley Moos, wat in 2021 tot voorsitter van die raad van die Universiteit van Stellenbosch (US) verkies is, is Dinsdagaand in ’n kliniek in Stellenbosch dood ná komplikasies weens narkose.
Die familie sê in ’n kort verklaring hy is skielik en onverwags dood ná die toediening van narkose vir ’n klein prosedure aan sy mond.
“Nie net het die universiteit ’n uiters knap raadsvoorsitter verloor nie, maar ’n besonder gewaardeerde en lojale vriend van die universiteit,” was prof Wim de Villiers, rektor en visekanselier van die universiteit, se woorde toe hy van die nuus verneem het.
“Dit is uiteraard ’n groot skok vir die universiteitsgemeenskap en dit kom, om die minste te sê, in ’n tyd wat die universiteit swaar geleun het op sy bestuurskundigheid én sy bewese ervaring as kommunikasiespesialis, maar ook wat betref sy vaardighede as bestuurder van belanghebberverhoudinge in die korporatiewe wêreld.
“Op ’n persoonlike vlak was sy ondersteuning aan my inspirerend. Matieland het inderdaad ’n groot vriend verloor. In die besonder dink ons in hierdie hartseertyd aan sy familie en geliefdes,” sê De Villiers.
Moos was ook ’n lid van die uitvoerende span van die finansiëledienstemaatskappy African Rainbow Capital (ARC). Hy was ’n US-alumni wat die grade BA, BPhil (Joernalistiek) en MBA aan die universiteit verwerf het. Hy het ook leierskapsprogramme by GIBS, Wits en Harvard voltooi.
In sy vroeëre loopbaan het hy in 2002
as verslaggewer by Beeld en daarna by Landbouweekblad gewerk. Hy het in Januarie 2008 as redakteur van Landbouweekblad
oorgeneem en was die tiende redakteur. Dit was nadat sy voorganger, Jean du
Preez, die tydskrif se uitgewer geword het. In 2009 het hy redakteur van Volksblad
geword en was daarna ook onder groephoof van kommunikasie by Sanlam.
In ’n huldeblyk sê Du Preez die een ding wat hy altyd van Moos sal onthou, is die absolute toewyding waarmee hy sy beroep benader het.
“Ons het mekaar dikwels raakgeloop op landbougeleenthede toe hy nog ’n jong verslaggewer by Beeld was, en telkens het dit my opgeval met watter ywer en gemak hy met landbouleiers en besluitnemers oor die weg kom. Uiteraard het dit hom in staat gestel om ’n vertrouensverhouding met mense van belang in die bedryf op te bou, en hy het toegang gehad tot uitstekende inligtingsbronne – wat goud werd is vir ’n joernalis.
“ ’n Ander aspek van Ainsley wat ek sal onthou, is dat hy nooit bang was om raad te vra as hy onseker oor iets was nie. Dit was vir my ’n kenmerk van ’n groot leier: om vertrouelinge te raadpleeg. Ongelukkig was sy verblyf by Landbouweekblad kort – net twee jaar. Koos Bekker het sy talent ook raakgesien en besluit om hom as Volksblad se redakteur aan te stel.
“In tipiese landbou-spreektaal: Landbouweekblad sal Ainsley Moos as een van sy groot ysters onthou!”
Laai die Landbou.com-app af en lees jou landbounuus direk op die app. Dié app is beskikbaar in die Apple-, Android- en Huawei-winkels.
