Die departement van water en sanitasie het gisteraand gewaarsku dat hoë watervlakke en moontlike vloede verwag word by Douglas in die Noord-Kaap weens die wateruitvloeie by die Vanderkloof- en Bloemhofdamme. Douglas is by die samevloeiing van die Vaal- en Oranjerivier.
Die departement het toe gesê dat nóg twee sluise by die Vaaldam geopen is, sodat 12 in totaal oop is. Die oopmaak van nóg sluise is deel van sy deurlopende voorsorgmaatreëls vir damveiligheid.
“Inwoners word gevra om waaksaam te wees en mag dalk moet ontruim waar nodig om skade en lewensverlies te voorkom,” luidens die verklaring. Die departement vra ook gemeenskappe aan die Vaal- en Oranjerivierstelsel om waaksaam te bly.
