Geslagte se werk is nodig om die agterstand in te haal in kennisoordrag en opleiding in Suid-Afrika. Een van die oplossings is die benutting van tegnologie, soos selfoon-bedryfstelsels, meen 'n plaaslike ondernemer.
Me. Rapelang Rabana, stigter en uitvoerende hoof van Rekindle Learning, sê mense moet hulle nie blind staar teen 'n gegewe stel faktore of lewensomstandighede nie.
Sy het op Landbouweekblad se konferensie in Bloemfontein gesê die wêreld, soos mense dit ervaar, hoef nie as die enigste werklikheid aanvaar te word nie, aangesien dit konstant aan die verander is.
Rabana is een van die Suid-Afrikaanse ondernemers wat deur die tydskrif Forbes as een van Afrika se top-ondernemers onder die ouderdom van 30 jaar aangewys is.
Haar onderneming, Rekindle Learning, bied oplossings vir opleiding wat op mobiele platforms gebruik kan word. Volgens haar kan opleiding selfs op landbouvlak en op plase met die benutting van selfoontegnologie geskied.
Sy het as ondernemer die geleentheid benut om vaardighede en kennis vinnig en maklik oor te dra aan mense wat deel uitmaak van 'n vinnig veranderende werkmag. "Dit is van die uiterste belang dat jong mense in dié land en in Afrika bemagtig en opgelei moet word sodat die vasteland tot sy volle potensiaal kan ontwikkel," sê sy. "Dit verg groot ontwikkelingspronge om die vaardighede oor te dra."
Van haar ander projekte hou verband met onder meer maniere om jong mense by tegnologie-oordrag betrokke te kry, asook 'n projek in Kenia.
