Landboubeleid sal waarskynlik hoog op die agenda wees op die konferensie, met die brandende kwessies van voedselsekerheid en grondhervorming wat veral aandag sal geniet. Die uitkoms van die beleidskonferensie wat in Julie 2022 plaasgevind het, gee ’n aanduiding van die ANC se benadering tot dié kwessies.
Dáár is reeds aanvaar die landbou is ’n belangrike sektor van die Suid-Afrikaanse ekonomie – en veral van die landelike ekonomie – want dit het die potensiaal om deur verhoogde produksie en vinnige, verantwoordelike en doeltreffende grondhervorming armoede vir baie Suid-Afrikaners te verlig.
Die ANC se oorkoepelende standpunt oor die landbousektor gee ons broodnodige hoop dat daar beleidsekerheid sal wees en dat meer beleggings na hierdie uiters belangrike sektor van die ekonomie sal vloei. Maar in Suid-Afrika lei welmenende politieke stellings, toesprake en debatte nie altyd tot goeie en gunstige uitkomste nie.
