Agri Wes-Kaap het verskeie knelpunte uitgelig wat dié organisasie graag in pres. Zuma se staatsrede uitgelig wil sien. “Die tyd vir staatsmanskap is nou broodnodig, dit is nie meer tyd vir populistiese leierskap nie,” sê die organisasie in ’n mediaverklaring.
“Agri Wes-Kaap hoop vir meer fondse vir droogte- en ramphulp vir landbou om die impak van die droogte te bestuur. Ons versoek meer fondse vir brandbestryding en rampbestuur en dat die reg sy gang vinniger sal gaan in gevalle waar brande kwaadwillig ontstaan,” lui die verklaring verder.
Die verbetering en instandhouding van waterinfrastruktuur is ook hoog op die lys, en die groep vra dat boere ook ondersteuning kry om damkapasiteit up hul plase te vergroot, wat tans weens rompslomp prakties onmoontlik is.
Wat grondhervorming aangaan sê Agri Wes-Kaap dat daar tans meer geld aan grondhervorming bestee is as wat suksesse regverdig. “Onuitvoerbare planne wat min sakesin maak en verkwiste uitgawes in die vorm van die konstante herkapitalisering van dieselfde projekte is aan die orde van die dag. Ons versoek die president om toe te sien dat kundige rolspelers wat sinvolle bydraes kan lewer, om die tafel sit en dat ekonomiese sukses swaarder as politieke motiewe sal weeg.
“Die onsekerheid vir landbouers wat grond aanbetref is nie net ’n probleem vir die landbou nie, maar vir die land se ekonomie in die geheel. ’n Platteland wat vanweë ’n gebrek aan werksgeleenthede ontvolk, plaas druk op stede wat weer druk op die staatskas gaan verhoog.”
“Die onderbefondsing en kapasiteit van die landelike veiligheidsmodel, tesame met die regswaardeketting van die Nasionale Vervolgingsgesag, Departement van Justisie en Korrektiewe Dienste, faal die landbousektor. Kundigheid beroepslui word in bogenoemde departemente benodig, en nie kaderontplooing wat die diens verswak nie,” sê Agri-Wes Kaap verder.
