Die Regering se beleid om duisende klein bestaanboere te vestig, strook nie met ekonomiese beginsels wat die konsolidering van boerdery-eenhede noodsaak nie.
Só sê mnr. Motsepe Matlala, voorsitter van die National African Farmers’ Union (NAFU), in reaksie op pres. Jacob Zuma se staatsrede.
Konsolidering is nodig vir boerderye om te kan oorleef en nuwe tegnologie te kan bekostig om doeltreffender te kan wees, sê hy.
“As kommersiële boere in ‘n voortdurende stryd is om met lae voedselpryse winsgewend te kan bly, hoe sal kleiner, minder kostedoeltreffende eenhede ooit kan hoop om in kommersiële boere te kan ontwikkel?”
Matlala sê die geld wat vanjaar vir die landbou toegewys is, is heeltemal onvoldoende om aan die ernstige uitdagings te kan aandag gee.
Altesame R7 miljard is oor drie jaar toegeken om 450 000 bestaansboere en 54 500 kleinboere te help, wat neerkom op R4 626 per boer per jaar. “Die vraag wat gevra moet word, is of hierdie inisiatief doeltreffend kan wees?”
