Zegna, die bekende Italiaanse vervaardiger van fynwolkleedstowwe, bied dié seisoen weer ’n fynwolkompetisie aan om die beste vag van 17,9 mikron en fyner te vind.
Die doel is om produsente aan te moedig om fyner te teel en die gehalte van hul wol te verbeter. Punte word volgens ’n glyskaal toegeken vir veseldeursnee, gewig, treksterkte en eenvormigheid in die stapel. Veseldeursnee tel die meeste punte, nl. 50 uit ’n totaal van 100. Die beoordelaars let ook op treksterkte en die gesonde groei van die stapel. Daarbenewens moet die wol ’n goeie lengte hê.
Geen vagte van skape wat jassies gedra het, sal aanvaar word nie.
Ermenegildo Zegna se wolmeule is in 1910 in Trivero, ’n klein Italiaanse dorpie naby Biella, opgerig en word sedertdien deur die familie bedryf. Die voorsitter is graaf Paolo Zegna. Die maatskappy het sy eerste fynwolkompetisie in 1963 in Tasmanië, Australië geloods.
Vandag is die Zegna-groep, wat ’n toonaangewer in die vervaardiging van fynwolstowwe van gehalte is, een van die grootste verbruikers van ekstrafyn-Merinowol en het die maatskappy sowat 5 000 mense oor die hele wêreld heen in diens.
Die sluitingsdatum vir inskrywings is 28 Februarie 2010. Inskrywingsvorms is by wolmakelaars en op Cape Wools se webwerf by www.capewools.co.za beskikbaar.
Vir meer inligting skakel Ona Viljoen, André Strydom of Jakes Mulder of by Cape Wools, tel. 041 484 4301, of stuur ’n e-pos aan onav@capewools.co.za.
5 Oktober 2010
