Agri SA verwelkom dit dat in die begroting gehoor gegee is aan beroepe vir infrastruktuurbeleggings wat ooreenstem met beloftes in pres. Cyril Ramaphosa se staatsrede. Agri SA is veral dankbaar oor die finansiering van Sanral en die belegging in die Suid-Afrika se waterinfrastuktuur, soos die R2,1 miljard wat toegewys is vir die verhoging van die wal van die Clanwilliamdam.
Ander stappe wat Agri SA verwelkom het, sluit in die gebeurlikheidsreserwe van R5 miljard vir die Land Bank, die besluit om die brandstof- en die padongelukkefondsheffings onveranderd te laat, gegewe die groot rol wat brandstof speel in insetkoste en koste in die breër landbou- en voedselwaardekettings.
Agri SA verwelkom ook die verlaging in korporatiewe belasting wat in 2023 in werking tree. Hoewel die hoër koolstofbelasting ’n nadelige uitwerking sal hê op die landbousektor, bied die uitstel van die eerste fase van die koolstofbelasting tot 2025 ’n welkome blaaskans vir die sektor.
AKSYNSBELASTING
Die wynbedryf is besig om te herstel van die impak van die plaaslike drankverbod.
“Agri Wes-Kaap verwelkom die aankondiging dat die huidige prysmodel vir brandstofpryse hersien sal word en is dankbaar dat die verhoging in aksynsbelasting op drank in ooreenstemming met inflasie is,” sê mnr. Jannie Strydom, uitvoerende hoof van Agri Wes-Kaap.
Agri SA sê die verhoging in die belasting op tabak en suiker sal die vermoë van hierdie bedrywe om te herstel van die terugslae ná covid-19, ernstig strem.
Agri SA waarsku dat staatslone steeds ’n beduidende risiko vir die fiskus inhou, veral omdat salarisonderhandelinge voortgaan. Die besteding aan maatskaplike toelaes sal ook versigtig bestuur moet word.
INFRASTRUKTUUR
Agri Wes-Kaap ondersteun die regering se ingrypings om probleme met infrastruktuur aan te pak.
“Die aankondiging van inisiatiewe op mediumtermyn om die doeltreffendheid van hawens te verbeter en spoorweë se kapasiteit uit te brei, is goeie nuus vir die landbousektor,” sê Strydom.
Die organisasie verwelkom ook die aankondiging dat R8,7 miljard tot die polisie se begroting toegevoeg is. “Landelike veiligheid is vir Agri Wes-Kaap uiters belangrik en daarom verwelkom ons die bykomende geld vir die polisie.”
Die bewilliging van R1,3 miljard aan die landbouproduksie-, biosekerheids- en hulpbronbestuursprogram in die departement van landbou, grondhervorming en landelike ontwikkeling is goeie nuus vir die sektor.
