Kwessies rondom groei, werkloosheid en armoedeverligting sal nie hanteer kan word as Suid-Afrika se aandeel in internasionale handel en belegging nie verhoog nie, sê prof. Raymond Parsons, adjunk uitvoerende hoof van Besigheideenheid Suid-Afrika (Busa).
“Ons ekonomiese vooruitsigte en prestasie word nouliks verbind met ons ekonomiese verhoudings met die buitewêreld en hoe hierdie verhoudings bestuur word. Oor die afgelope paar maande het pres. Jacob Zuma, met die sakesektor se steun, ernstig probeer om verhoudings te bou,” het Parsons gesê.
Die landbou is belangrik vir groei omdat daar onlangs bevind is dat ’n onregstreekse bydrae van 2% tot die bruto binnelandse produk (BBP) gemaak word vir elke persent wat die landbou regstreeks bydra.
“Vir elke miljoen rand wat in die landbou belê word, sal dié sektor ook dubbel soveel werksgeleenthede kan skep as ’n gelyke belegging in die nywerheidsektor. Nege uit tien van die land se grootste werkskeppers is ook in die landbou-ondernemings gesetel.”
Parsons sê om munt te slaan uit die landbou, is internasionale mededingendheid belangrik. “Dank sy globalisering is skaalekonomie en interne skakels laer af in die waardeketting nou belangrike faktore wat die nasionale ekonomiese mededingendheid en sukses bepaal.”
Hoewel gespesialiseerde boerderye en produksie op ’n klein skaal binne ’n internasionaal mededingende landbouprentjie moontlik is, is dit gespesialiseerd, vaardigheidsintensief en afhanklik van tegnologie.
19 Oktober 2010
