Dis nie nodig om Suid-Afrikaanse studente na Chinese universiteite te stuur om kundigheid in landbou-, bosbou- en visseryedissiplines te gaan opdoen nie.
Plaaslike landboufakulteite het genoeg kapasiteit om aan al die behoeftes te voldoen, glo prof. Johann Kirsten, hoof van die departement landbou-ekonomie, voorligting en landelike ontwikkeling aan die Universiteit van Pretoria.
Kirsten se uitspraak volg op ‘n advertensie in die mees onlangse uitgawe van die weekblad Mail & Guardian waarin die departement van Landbou, Bosbou en Visserye vol beurse aanbied vir nagraadse studie aan drie universiteite in China. Die beurse is bedoel om studente op te lei in die Regering se “voorkeurprogramme” van grond- en agrariese hervorming, bewaringsboerdery, landboumeganisasie, visgesondheid en bosboubestuur.
Die beurse dek ‘n retoerkaartjie na China, onderriggelde, ‘n maandelikse onderhoudsbedrag, siekte- en ongevalleversekering, boeke, akkommodasie in ‘n universiteitskoshuis en maaltye.
Kirsten sê die geld kan liewer vir beurse by Suid-Afrikaanse universiteite bestee word. Hulle beskik beslis oor die nodige kapasiteit.
Kirsten sê Suid-Afrikaanse universiteite staan hoog aangeskrewe in die wêreld en het samewerkingsooreenkomste met navorsingsinstansies wat wêreldleiers is. “Waar is die patriotisme? Hoekom ondersteun die departement van Landbou nie ons eie instellings nie?”
Lees meer in Landbouweekblad se uitgawe van 28 Januarie 2011.
19 Jnaurie 2011
