Mnr. André de Ruyter, uitvoerende hoof van Eskom, het vanoggend (Sondagoggend) tydens Eskom se mediakonferensie sy innige verskoning aangebied vir die wydverspreide en groot impak wat beurtkrag op die land, ekonomie en mense se daaglikse lewens het.
Eskom het ’n oorsig gegee oor die stand van die land se kragnetwerk en wat gedoen word om die kragkrisis te bestuur en te verbeter.
De Ruyter het erken Eskom se energiebeskikbaarheidsfaktor het die laaste weke sleg gedaal en is op die oomblik 58%. Volgens mnr. Jan Oberholzer, bedryfshoof, is 12,5% van Eskom se opwekkingsvermoë tans nie beskikbaar nie weens beplande en onbeplande onderbrekings.
Mnr. Mpho Makwana, direksievoorsitter van Eskom, het ook gesê Eskom besef die kragverskaffer se swak vertoning het 'n geweldige impak op die land, maar die omkeerplan in samewerking met verskeie belanghebbers soos verskeie departemente en die nasionale energiekrisiskomitee, is op dreef.
Volgens Makwana wil Eskom alles in sy vermoë doen om vir die volgende twee jaar beurtkrag tussen vlak 2 en vlak 3 te hou juis om mense en besighede die geleentheid te gee om beter te beplan. Die land kan so vroeg soos Dinsdag terugkeer na vlak 2-beurtkrag gedurende die dag, maar Oberholzer het ook gewaarsku enige onbeplande gebeure kan hierdie plan in die wiele ry. Vlak 3-beurtkrag sal wel in die aande ingestel word.
Makwana het gesê een van die maniere om Eskom te help om homself te verbeter, is om aansporings by kragstasies in te stel. Daar is tans geen aansporings vir goeie vertonings by kragstasies nie.
Hy het ook genoem die soektog om De Ruyter se pos van uitvoerende hoof en Oberholzer s'n van bedryfshoof te vul, is aan die gang.
Hy het die beweerde vergiftiging van De Ruyter beskryf as boos. “De Ruyter het amper die grootste opoffering betaal.”
- Vollediger beriggewing oor Eskom se planne volg
